Asteburu honetan, Bilboko Koral Elkarteko orkestrak eta Etorkizuna Musikatan proiektua bat etorrita entzunak izateko elkartuko dira.
Bihar, ostiralez, 19:30ean Erruki Etxeko lorategian, orkestra biek entsegu orokorra egingo dute; eta 18an, larunbatean, 12:00etan Arriaga Antzokiko plaza agertoki irekia bihurtuko da.
Taldeak Bilboko Koral Elkartearen Musika Ikastetxeko eta Norai Elkartearen Etorkizuna Musikatan proiektuko ia ehun gaztek osatuta daude.
Bilbon, 2022ko ekainaren 16an. Bilboko Koral Elkarteko eta Etorkizuna Musikatan egitasmoko ikasturte-amaiera erakunde biek elkarrekin kontzertu bat emanez ospatuko dute, ekainaren 18an, larunbatean, 12:00etan Arriaga Antzokiko plazan. Ekitaldiak, azpiegiturari dagokionez, Arriaga Antzokiaren laguntza izango du, eta plaza publikoari irekitako agertoki bihurtuko da. Era berean, bezperan, Erruki Etxe Santuko lorategian entsegu orokorra egingo dute. Erakunde anfitrioiak eta bertako egoiliarrek hilabete asko eman dituzte inora atera gabe, COVID-19tik babesteko, baina azkenean bihar, 19:30ean, hango ateak publikoari irekiko zaizkio, pertsonarik zaurgarrienek ere musikaz goza dezaten.
Hala, 6 eta 20 urte bitarteko 87 gaztek, nork bere musika-maila izanik, doinu klasiko eta herrikoi ezagunak jo ahal izango dituzte batera, oinezkoen gozamenerako. Interes akademiko eta artistikoaz harago, ekimen honek osagai sozial eta interkultural garrantzitsua dauka, hainbat jatorritako musikariak agertoki berean biltzen baititu: batetik, Bilboko Koral Elkartearen Musika Ikastetxeko instrumentistak, orkestra-irakasgaia ikasten ari direnak; bestetik, Bilbo Zaharra inguruko haurrak, testuinguru soziokultural zailetan bizi izanda Norairen Etorkizuna Musikatan proiektuan beren burua artistikoki prestatzeko lekua aurkitzen dutenak.
Batzuek eta besteek ikasturte honetan bakarka eta taldeka landu dituzten obren arteko zenbait joko dituzte. Hasteko, Mario Martínen gidaritzapean, Bilboko Koral Elkarteko ikasleek Karl Jenkinsen Palladio, Edvard Griegek konposatutako Suite Peer Gynt obrako Mendiko erregearen haitzuloan eta zenbait dantza eskoziar tradizional joko dituzte. Ondoren, Etorkizuna Musikatan-eko orkestrak, Lino Castilloren zuzendaritzapean, Oskorriren Furra furra, Tormod Tvete Vikek moldatutako Finvisan eta George Bizeten Farandole. Amaitzeko, denek batera, José María Usandizagaren Euskal Festara, Carlos Medranoren Merengue del primer dedo eta Ludwig van Beethovenen Alaitasunari oda.
Irrikaz esperotako eta egutegian markatutako ekitaldi honek, aurtengo ikasturte biziari amaiera bikaina emateaz gain, gazteei alderdi pertsonalean ahalik eta gehien hedatzen lagunduko die, orkestra-musikaren eta haren balioen hedapenaren bidez.
