Euskeria Abesbatzak eta Bea Asurmendi euskal musikaz bete dute Guggenheim museoa Gabriel Arestiren omenez
Datorren astelehenean, urriak 6, arratsaldeko 20:00etan, Bilboko Koral Elkarteko Euskeria Abesbatzak kontzertu berezia eskainiko du Guggenheim Bilbao Museoaren atarian, Gabriel Arestiren heriotzaren 50. urteurrena dela eta.
Musika koralak, poesiak eta sorkuntza garaikideak gure kultura omenduko dute. Kontzertua Guggenheim Museoaren eta ETBren lankidetzarekin egin da, eta grabatu egingo da, ondoren telebistan emateko. Horrela, proposamena askoz publiko zabalagoari helaraziko zaio.
Bidaia musikal eta poetikoa
Ordubete pasatxoan zehar, Euskeria Abesbatzaren indarra eta Antton Telleria Lopetegi (bateria), Antxon Sarasua Astiazaran (teklatuak), Ander Ederra Arruti (gitarra elektrikoa) eta Joanes Ederra Arruti (baxu elektrikoa) musikariek osatutako talde instrumentalaren energia batzen dituen programaz gozatu ahal izango da.
Ikuskizunean Bea Asurmendi kantautoreak ere hartuko du parte, Giovanni Cresseri baxu-jotzailearekin batera.
Dramaturgia Idoia Jauregiren ahotsarekin osatuko da, zeinak Gabriel Arestiren poemak irakurriko baititu kontzertuan zehar, musikaren eta hitzaren arteko haria sortuz.
Proiektu hau zuzenean nahiz telebistan gozatzeko asmoz sortu da, eta aukera paregabea da euskal musika korala, soinu garaikideak eta poesia Guggenheim bezalako espazio enblematiko berean nola elkartzen diren ezagutzeko.
